Azərbaycan Bilyard Federasiyası (ABF), Azərbaycan Respublikasının Gənclər və İdman Nazirliyi və “AzPulMat” şirkətinin təşkilatçılığı ilə 2025-ci il dekabrın 13–15-i tarixlərində “Pool” bilyard idman növü üzrə ölkə çempionatı keçiriləcək. Çempionat həm kişilər, həm də qadın idmançılar arasında baş tutacaq.

BrendSport.az xəbər verir ki, bu tədbir Azərbaycanın bilyard idmanında növbəti mühüm mərhələ olmaqla, ölkəmizdə “pool” növünün inkişafına, idmançıların peşəkarlıq səviyyəsinin yüksəldilməsinə və beynəlxalq arenada uğurlar üçün yeni istedadların aşkar edilməsinə xidmət edir.

Çempionatda ölkənin müxtəlif regionlarından güclü idmançıların iştirakı gözlənilir. Yarışlar beynəlxalq standartlara uyğun qaydalar əsasında təşkil olunacaq və qaliblər həm medallar, həm də diplomlarla təltif olunacaqlar.

Tədbirin keçirildiyi yer:
Bakı şəhəri, Tbilisi prospekti 12, Heydər Əliyev adına İdman-Konsert Kompleksi, 5-ci sektor (2-ci mərtəbə)

Tarix: 13–15 dekabr 2025-ci il

Azərbaycan Bilyard Federasiyası media nümayəndələrini, idmansevərləri və bu sahəyə marağı olan hər kəsi ölkə çempionatını canlı izləməyə dəvət edir.