Futzal üzrə Birinci Liqanın lideri “Qarabağ” komandasının rəhbəri Kamran Sadıqov Azərbaycan Futzal Federasiyasının mətbuat xidmətinə müsahibə verib. Müsaibəni təqdim edirik.


- “Qarabağ” futzal komandası necə yaradıldı? İdeya müəllifi kimdir?

- 2016-cı ilin yazında belə bir ideya yarandı. Buna qədər Ağdam komandası əvvəlcə Birinci, daha sonra Yüksək Liqada çıxış edirdi. Həmin komandada oynayan uşaqlar arasında dostlarım vardı. Onlar təklif etdi ki, çempionata komanda burax. Futbola yaxın adam olduğumu bilirdilər. Razılaşdım. Sonra futzal federasiyasının baş katibi Mahmud müəllimlə (Mahmud Sadıqov) tanış oldum, fikrimi onunla bölüşdüm. Təsəvvür edin, iştirak üçün 17 komandanın müraciəti təsdiqlənib, bir yer qalıb. Söhbətimizdən sonra, bizə çıxış etmək üçün “yaşıl işıq” yandırdı. Komanda belə yarandı və 2016/17-ci il mövsümünü 7-ci pillədə başa vurduq. Bizimlə oyunlar həqiqətən də maraqlı keçirdi, rəqiblərimiz daha yaxşı mübarizə aparırdı komandamıza qarşı. Cari mövsümdə isə fərqli çıxış edirik.

- İlk mövsümdən sonra güclənməyə qərar verdiniz?

- Açığı, çempionatın əvvəlində birinci yerə yüksələcəyimizi gözləmirdim. Düşünürdüm ki, ötən mövsümü 7-ci pillədə başa vurmuşuq, bu dəfə 4 və ya 5-inci yeri tutarıq. Şükürlər olsun ki, hələ işimiz yaxşı gedir. Yekunda necə olacaq, onu zamanı çatanda biləcəyik.

- Ancaq cari mövsümün reqlamenti fərqlidir. İki dövrəni zirvədə başa vursanız da, çempion olmaq üçün pley-off oyunlarını qələbə ilə bitirməlisiniz...

- Çempionatın əvvəlində keçirilən yığıncaqda belə söhbət oldu. Əvvəl razılaşdıq, ancaq sonradan dəyişiklik edilməsini təklif etsək də, razılaşmadılar.

- Futzaldakı “Qarabağ”ın futboldakı “Qarabağ”la bağlılığı varmı?

- Bağlılıq deyəndə, Rəşad Sadıqovun qardaşı olduğumu bilirsiniz. Rəşad da hazırda “Qarabağ”dadı. Bizim bu klubun tərkibinə keçməyimizə bir addım qalıb. Nəticələrimizi izləyirlər, komanda haqda məlumatlıdılar. Ancaq rəhbərliklə hələ üz-üzə oturub, bu haqda söhbət etməmişik.

- Amma komandanın oyun formasında “Azersun”un reklamı yerləşdirilib…

- Ötən mövsüm sponsorumuz fərqli şirkət idi. Bu il heç bir sponsorumuz olmadığına və komandanı özüm maliyyələşdirdiyimə görə, bu addımı atdıq.

- Sizə maddi baxımdan dəstək verən varmı?

- Hələ sırf özüm maliyyələşdirirəm komandanı. Bir-iki nəfər birinci dövrədə kömək etdi. İndi hər şeyi özüm edirəm.

- Bəs Rəşad?

- Yox, Rəşad hələ maddi dəstək vermir.

- Ümumiyyətlə, Rəşad futbolda səndən daha təcrübəlidir. O, bu ideyanı, addımını necə qarşıladı?

- Məni futboldan Rəşad uzaqlaşdırdı. İmkan vermir futbol sahəsinə daxil olum. Halbuki, futbolla bağlı arzularım olub. İstərdim ki, futbol komandam olsun, I divizionda çıxış etsin. Ancaq qardaşım imkan verməyib. Bu il I divizion klublarından biri məni komandanın rəhbəri vəzifəsinə dəvət etmişdi. Di gəl, Rəşad icazə vermədi. Bu futzal komandası olduğuna görə, bir söz demir. Komandamız “Qarabağ” klubunun tərkibinə daxil olduqdan sonra daha iddialı olacaq və Yüksək Liqada çıxış edəcəyik.

- Rəşad komandanın nəticələri ilə necə, maraqlanırmı?

- Hamısından xəbərdardı.

- Bəs canlı izləmək istəmir oyunlarınızı?

- Yəqin play-off mərhələsinin oyunları zamanı onu da dəvət edəcəm.

- Məsləhətləşirsinizmi?

- İndi ondan məsləhət almıram. Sadəcə, nəticələrimiz və oyunlarımızla bağlı məlumat verirəm. Komandamızın baş məşqçisi var - Nəsimi Nuriyev. Onun futzalı yaxşı bilməsinin komandaya faydası çoxdu.

- Necə düşünürsən, “Qarabağ” böyük futbolda qazandığı uğurları futzalda da əldə edə biləcəkmi?

- İnanıram, biz bura onun üçün gəlirik. Birinci Liqada vaxt keçirmək niyyətində deyilik. Növbəti il Yüksək Liqada oynamaq istəyirik. Orda bir qədər təcrübə topladıqdann sonra 2020-ci ildə Çempionlar Liqasında çıxış etməyi planlaşdırırıq. Futzalda “Araz” ən güclümüzdü. Biz də onlardan sonra Çempionlar Liqasında ölkəmizi təmsil etmək istəyirik. Niyyətimiz budu.

- Deməli, Yüksək Liqada oynamağı qətiləşdirmisiniz?

- Komanda çıxışını ancaq Yüksək Liqada davam etdirəcək.

- Hazırkı heyətdə elə oyunçular var ki, böyük futbolda hələ də çıxış edirlər. Yüksək Liqada
oynayacağınız təqdirdə, buna icazə verilməyəcəyini bilirsən?

- Yüksək Liqada hazırkı 12-13 nəfərlik heyətdən 3, maksim 4 oyunçu çıxışını davam etdirəcək. Qalanları futzal oynamış təcrübəli oyunçular olacaq.

- Yəqin ki, gözaltı etdiyiniz oyunçular var?

- İşə başlamışam. Play-offa yaxın, ya da bu mərhələdən dərhal sonra hər şeyi yekunlaşdıracam. Çünki komanda yeni mövsümün startına 2 ay qalmış hazırlığa başlamalıdı.

- “Qarabağ” adı azarkeşləri cəlb etmək baxımından işinizə yarayacaqmı?

- Azarkeşləri indi də gətirə bilərəm. “Qarabağ”ın fan-klubunun rəhbəri ilə dostuq. O, deyib ki, nə vaxt istəsən, azarkeşləri oyunlara gətirə bilərəm. Sadəcə, Birinci Liqada oynadığımıza görə, buna ehtiyac duymuram. Ancaq Yüksək Liqada çıxış etsək, bizim oyunlara azarkeşlər cəlb olunacaqlar.

Qol.az