Monakoda Avropa Liqasının 2018/2019 mövsümünün Bakıda keçiriləcək final matçına özəl hazırlanmış loqo təqdim olunub.

Loqoda təsvir edilən yarışın kuboku Bakının lokal xüsusiyyətlərini əks etdirən ecazkar arxitektur nümunələri ilə əhatə olunub.

Loqonun dizaynında Azərbaycan Dövlət Akademik Filarmoniyası, Alov Qüllələri, Qız Qalası, Heydər Əliyev Mərkəzi və Hökumət Evi kimi məşhur tikililərinin təsvirindən istifadə olunub. Loqonun brendinqi Avropa qitəsini və Bakını əhatə edəcək yarışın dinamik təbiətini və coğrafi xüsusiyyətlərini tərənnüm edir.

Azərbaycan dünyada "Odlar Diyarı” kimi tanınır. Bundan yola çıxaraq, loqoda "A” hərfi alov dilimləri formasında oyularaq dizayn edilib.

"Buta” naxışı isə milli geyimlərdə, xalçaçılıqda, eləcə də toxuculuq sənayesində sıx istifadə edilir. Bundan ilhamlanaraq, Avropa Liqası üçün gələcəkdə müxtəlif dizayn işlərində istifadə edilə biləcək xüsusi "Buta” naxışı hazırlanıb.

Qeyd edək ki, "Bakı 2019” finalı üçün yeni mövsümün başlanğıcında təqdim edilən əsas dizayn elementlərindən də yararlanaraq hazırlanmış xüsusi loqo Bakı şəhərinin qədim və müasir xüsusiyyətlərini əks etdirir. Avropanın gələcək futbol turnirlərində və yarışlarında, eləcə də müxtəlif təqdimatlarda və reklam işlərində loqonun daha da təkmilləşdirilməsi qarşıya qoyulan məqsədlərdəndir.

Yeni loqonun brendiqi UEFA-nın marketinq tərəfdaşlığı, həmçinin "TEAM Marketing AG və Turquoise” brendinq agentliklərinin əməkdaşlığı ilə hazırlanıb.