BrendSport.az saytı xəbər verir ki, Naxçıvan şəhərində keçirilən kişilər arasında şahmat üzrə Azərbaycan çempionatının ilkin mərhələsi sona çatıb. Yarışın əsasnaməsinə əsasən ilk dörd yeri tutan şahmatçı final mərhələsinə vəsiqə qazanıb.

Hərəyə 7 xal toplayan Vasif Durarbəyli və Misrətdin İsgəndərov 1-2-ci yerləri bölüşdürüb. Əlavə göstəricilərə görə Vasif Durarbəyli birinci yerin sahibi olub. Aydın Süleymanlı 6 xal ilə 3-cü yeri tutub. Hərəyə 5.5 xal toplayan Məhəmməd Muradlı, Eltac Səfərli, Murad İbrahimli və Əhməd Əhmədzadə 4-7-ci yerlərdə qərarlaşıb. Əlavə göstəricilərə görə 4-cü yerə layiq görülən Məhəmməd Muradlı final mərhələsinə vəsiqəni təmin edib.

Çempionatda iki şahmatçı - Xəzər Babazadə və Uğur İlyaslı beynəlxalq usta normasının yerinə yetirib.

Beləliklə yarımfinalda Vasif Durarbəyli Muradlı Məhəmmədlə, Misrətdin İsgəndərov isə Aydın Söleymanlı ilə qarşılaşacaq.

Final mərhələsi 15-18 fevral tarixlərində keçiriləcək. İlk oyunlar saat 14-00, cavab görüşləri 12-00-da başlayacaq.

Qeyd edək ki, final mərhələsi İdman Azərbaycan kanalı ilə şərh olunacaq. Partiyaları beynəlxalq qrossmeyster, gənclərdən ibarət yığmanın baş məşqçisi Fərid Abbasov və beynəlxalq qrossmeyster Nicat Abasov şərh edəcək.