Azərbaycan Kuboku tarixində yalnız üç komanda titula yiyələndiyi mövsümdə bütün görüşlərdə qələbə qazanıb.

BrendSport.az xəbər verir ki, bu barədə Peşəkar Futbol Liqasının rəsmi saytında bildirilib.

Qeyd olunub ki, “Zirə” finala qədər keçirdiyi bütün oyunlarda qələbə qazanıb. Rəşad Sadıqovun yetirmələri 5 matçda qalib gəliblər.

1993-1994-cü illər mövsümündə “Kəpəz”, 1994-1995-ci illər mövsümündə “Neftçi”, 2015-2016-cı illər mövsümündə “Qarabağ” kuboku qələbə seriyası ilə əldə edib. “Zirə” finalda qalib gəlsə, yalnız üç komandanın bacardığını təkrarlayacaq.

Yarışın tarixində daha üç klub mövsümdəki bütün matçlarını qalib başa vurub. Lakin “Şəmkir” (2001-2002), “Qarabağ” və “Qəbələ”nin (hər ikisi 2019-2020) uğurlu seriyaya imza atdığı mövsümlər başa çatmayıb.