Avqustun 29-da Milli Olimpiya Komitəsinin inzibati binasında keçirilən "Təhlükəsiz idman hamı üçün" mövzusunda seminara yekun vurulub.

BrendSport.az xəbər verir ki, seminarın ikinci günündə çıxış edən MOK-un İdman şöbəsinin baş məsləhətçisi, Təhlükəsiz idman üzrə Beynəlxalq Olimpiya Komitəsinin setifikatlaşdırılmış mütəxəssisi Vaqif Əliyev əvvəlcə seminar iştirakçılarını “Təhlükəsiz idman” mövzusunda məlumatlandırıb. O, fiziki tərbiyə müəlliminin səhvi, şagirdlərin zərərləri, psixoloji səhvlər, təlim (dərs) prosesində səhvlər, təşkilati və davranış səhvləri, xəsarət və nəticələrin nümunələri və digər mövzular barədə danışıb.

Təhlükəsiz idman üzrə məsləhətçi Ayan Xankişiyeva isə təlim iştirakçılarını qrup tapşırığı üzrə istiqamətləndirərək, onların mövzunu daha dərindən mənimsəməsi və təhlükəsizlik qaydalarını praktik şəkildə tətbiq etməsi ilə yanaşı, müzakirələrin aparılmasına da rəhbərlik edib.

Tədbirin sonunda seminarda iştirak edən təlimçilərə sertifikatlar təqdim edilib.

Ötən gün keçirilən seminarın ilk günündə MOK-un əməkdaşı Nərmin Kərimova Olimpiya dəyərlərinin tədrisi üzrə seçilmiş təlimçilərə OVEP layihəsinin metodologiyası və əsas komponentləri ilə bağlı geniş məlumat verib.

Tədbir çərçivəsində, həmçinin fiziki tərbiyə müəllimləri ilə qrup şəklində interaktiv oyunlar və müzakirələr aparılıb.

Qeyd edək ki, proqramın əsas məqsədi olimpizmin əsas dəyərləri - “hörmət”, “dostluq” və “mükəmməllik” haqqında məlumatların verilməsi və bu dəyərlərin gündəlik həyata inteqrasiya edilməsidir.