“Gəncə” voleybol komandası yetirməsi Fidan Dəmirova ilə müqavilə imzalayıb.

BrendSport.az xəbər verir ki, seleksiya xarakterli məşqlərdə fəallığı və inamlı oyunu ilə məşqçilərin diqqətini cəlb edən voleybolçu ilə bu mövsümün sonunadək müqavilə imzalanıb.

“Gəncə”nin prezidenti Elvar Osmanov F.Dəmirovanın heyətə cəlb olunmasını yüksək qiymətləndirib və bu istiqamətdə istedadlı voleybolçuların axtarışında olduqlarını bildirib:

“Gəncə voleybol məktəbinin yetirməsi ilə müqavilə bağlamaq çox sevindirici haldır. İnanıram ki, Fidan öz oyunu ilə həm azarkeşlərin, həm də milli komandaların məşqçilər korpusunun diqqətini cəlb etməyi bacaracaq. Məşqçilərimiz Şəki və Tovuzda da seleksiya məşqlərini izləyiblər. Hazırda məşqçilərlə bu görüşlərlə bağlı müzakirələr aparırıq. Əsas məqsədimiz yerli yeniyetmə voleybolçuların inkişafına kömək etmək, eləcə də milli komandalar üçün perspektivli idmançılar hazırlamaqdır”.

Qeyd edək ki, “Gəncə” komandası ölkə çempionatında 15 xalla 4-cü pillədə qərarlaşıb.