İspaniyanın “Hueska” klubu türkiyəli futbolçu Sərdar Gürlərin transferini tam rəsmiləşdirib.

Yeni mövsümdən La Liqada mübarizə aparmaq hüququ qazanan komanda ilə Türkiyənin “Osmanlıspor” klubundan transfer etdiyi 26 yaşlı yarımmüdafiəçi arasında 4 illik müqavilə imzalanıb. Bu barədə klubun rəsmi saytı məlumat yayıb.

Sərdar son mövsümdə “Osmanlıspor”un heyətində Super Liqada 29 qarşılaşmada iştirak edib. O, bu oyunlarda 12 qol və 5 məhsuldar ötürmə ilə yadda qalıb.

Futbol oynamağa Fransanın “Soşo” klubunda başlayan Gürlər karyerası ərzində “Gənclərbirliyi”, “Ərciyəsspor”, “Trabzonspor” və “Elazığspor” komandalarında da forma geyinib.