Beynəlxalq Olimpiya Komitəsi (IOC) insan hüquqları üzrə xüsusi məsləhətçi komitə yaradacaq.

BrendSport.az report-a istinadən məlumatına görə, bu barədə IOC prezidenti Tomas Bax Yaponiyanın paytaxtı Tokioda keçirilmiş İcraiyyə Komitəsinin yekunlarına dair mətbuat konfransında açıqlama verib. O bildirib ki, komitəyə əvvəllər BMT-nin insan hüquqları üzrə ali komissarı vəzifəsində çalışmış şahzadə Zeyd Raad əl-Hüseyn rəhbərlik edəcək. Qurumun tərkibinə idman və insan hüquqları sahələri üzrə 6 - 9 ekspert daxil olacaq. Komitə birbaşa IOC İcraiyyə Komitəsinə məruzələr edəcək.

Bax Tokio toplantısında bu qurumun yaradılması prosesində transgender idmançıların məsələsinin fəal müzakirə olunduğunu da vurğulayıb. Onun sözlərinə görə, IOC və olimpiya hərəkatı belə bir çətin problemi həll etməlidir: "Yeni komitə məhz idman yarışları kontekstində insan hüquqlarına cavabdehlik daşıyacaq. Çünki bizim idman yarışları hüdudlarını aşan və əksərən siyasi xarakter daşıyan problemləri həll etmək səlahiyyətimiz yoxdur".