Avqustun 2-də Azərbaycan Futzal Federasiyasının iclası keçirilib. Toplantıda Yüksək Liqanın 2021-2022-ci il mövsümünə hazırlıq işləri müzakirə olunub.
BrendSport.az federasiyaya istinadla xəbər verir ki, yeni mövsümdə 8 komandanın iştirak edəcəyi qərara alınıb. Onlardan 5-i ötən çempionatda da gücünü sınayıb. Daha 2 klub isə debütantdır və biri – “Alyans” Lənkəranı təmsil edir. Federasiya gənc futzalçıların inkişafı və təcrübə toplaması, eləcə də qarşıdan gələn Avropa çempionatına daha yaxşı hazırlaşması məqsədi ilə 19 yaşadək futzalçılardan ibarət Azərbaycan millisinin də Yüksək Liqada iştirakına icazə verib.
Beləliklə, Yüksək Liqanın 2021-2022-ci il mövsümündə “Araz-Naxçıvan”, “Neftçi”, EKOL, “Rekord”, “Alyans”, “Baku Fire”, “Xilə” və U-19 komandaları iştirak edəcəklər.
Qeyd edək ki, çempionat 3 dövrədən və pley-off mərhələsindən ibarət olacaq. İlk 4 pillədə yer alacaq komandalar (1-4, 2-3) qalibi müəyyənləşdirəcəklər. Yeni mövsümə sentyabrda start veriləcək.