Sentyabrın 11-13-də Macarıstanın paytaxtı Budapeşt şəhərində yerli Karate Federasiyasının təşkilatçılığı ilə uşaq, yeniyetmə, gənc və böyüklər arasında beynəlxalq turnir keçirilib.

BrendSport.az xəbər verir ki, turnirdə dünyanın 40-a yaxın ölkəsindən 2400-dən çox idmançı kata və kumite yarışlarında qüvvəsini sınayıb.

Mötəbər yarışda iştirak edən Azərbaycan Karate Federasiyasının və FHN-in İdman-sağlamlıq klubunun uşaqlardan ibarət karate komandasının üzvləri yüksək nəticələr əldə ediblər. Belə ki, kumite yarışlarında uşaqlar arasında 24 kiloqram çəki dərəcəsində (U-8 kateqoriyasında) Çingiz Abbasov 5 döyüş, 42 kiloqram çəki dərəcəsində (U-14 kateqoriyasında) isə Nəzrin Şahməmmədli 6 döyüş keçirərək bütün rəqiblərinə qalib gəlib və fəxri kürsünün ən yüksək pilləsinə qalxıblar. Bundan əlavə, komandanın digər üzvü – 35 kiloqram çəki dərəcəsində (U-12 kateqoriyasında) yarışan Ramal Şahməmmədli 5 döyüş keçirərək gümüş medala yiyələnib.

Qaliblərə Macarıstan Karate Federasiyasının təsis etdiyi kubok, medal və diplomlar təqdim edilib.