""Qarabağ" həqiqətən də çox yaxşı komandadır"
25-07-2018, 12:34
"Qarabağ"ın "Bursaspor"dan heyətinə qatdığı Con Delarj müsahibə verib. Ağdam klubuna keçidindən danışan konqolu hücumçu maraqlı fikirlər səsləndirib.
- Əvvəlcə "Qarabağ"a keçidinizlə bağlı təəssüratlarınızı bilmək maraqlı olardı...
- Həqiqətən də "Qarabağ"a keçdiyimə görə çox sevinirəm. Bu komandaya tarix yazmağa gəlmişəm.
- Transferiniz necə gerçəkləşdi?
- Hər şey çox ani oldu. Detalları sizə deyə bilmərəm. Amma onu deyim ki, bu keçiddən hər iki tərəf məmnun qaldı.
- "Qarabağ"dan təklif alana qədər bu komanda haqda nəsə bilirdiniz?
- Əlbəttə, müəyyən məlumatlarım var idi. Hətta Çempionlar Liqasında iştirak etməsindən də xəbərdar idim. Gəldiyim klubu tanıyıram. Bilirəm ki, "Qarabağ" Azərbaycanın ən yaxşı komandasıdır.
- "Qarabağ"dan başqa, digər təklifləriniz də var idi?
- Bəli, bir neçə klubdan da təklif almışdım. Amma seçimim "Qarabağ" oldu.
- Niyə məhz "Qarabağ"?
- "Qarabağ"ı ona görə seçdim ki, bu, mənim yenidən Çempionlar Liqasında oynamağım baxımından əla imkandır. Ümumiyyətlə, düşünürəm ki, "Qarabağ" futbol oynamaq üçün yaxşı komandadır.
- "Qarabağ"dan təklif gələndə bu komanda barədə, Azərbaycan futbolu haqda maraqlandınız?
- Təbii ki, bəzi insanlardan bilməli olduğum bütün vacib məlumatları soruşdum. Danışdığım şəxslər də "Qarabağ"la bağlı hiss etdiklərini təsdiqlədilər. Bu, həqiqətən də çox yaxşı komandadır.
- Yeni komandanıza nə vaxt qoşulacaqsınız?
- Ən qısa zamanda. Bu həftə ərzində artıq komandanın düşərgəsində olacağam.
- "Kukesi" ilə Bakıda keçiriləcək cavab matçında oynamaq şansınız var?
- Ümid edirəm ki, oynayacağam. Amma görək, necə olur. Əgər həmin matçda oynamaq imkanı qazansam, komandaya kömək etmək üçün əlimdən gələnin ən yaxşısını edəcəyəm.
Qol.az
Geri qayıt