Nəriman Abdullayev: Yığmamızın hazırlığı yüksək səviyyədə davam edir
1-03-2022, 17:27
Gənclərdən ibarət boks üzrə Azərbaycan yığmasının Avropa çempionatı üçün təlim-məşq toplanışı davam edir.
Azərbaycan Boks Federasiyasının (ABF) mətbuat xidmətindən BrendSport.az-a bildiriblər ki, 19-22 yaşlı oğlan boksçulardan ibarət yığma komandamız Bakı Boks Mərkəzində hazırlıq keçir.
Fevralın 21-də start götürən hazırlıq prosesi Xorvatiyanın Poreç şəhərində keçiriləcək yarışa hazırlıq xarakteri daşıyır. Millimiz əsas komandamızın böyük məşqçisi Nəriman Abdullayevin rəhbərliyi altında hazırlaşır.
Təcrübəli mütəxəssis ABF-in mətbuat xidmətinə açıqlamasında martın 13-23-də keçiriləcək çempionat ərəfəsində boksçularımızın yüksək əhval-ruhiyyədə olduğunu deyib: “Yığmamızın hazırlığı yüksək səviyyədə davam edir. Komandanın heyətinə 10-dək idmançı çağırmışıq. Hazırda əsas millidən köməkçi boksçular da bizimlə birlikdədirlər. Bu, gənclərin daha təcrübəlilərlə sınaq qarşılaşmaları keçirməsi və hazırlıqlı olması üçün atılan addımdır. Birgə təlim-məşq toplanışının hər 2 komandanın üzvlərinə faydalı olacağına inanıram”.
N.Abdullayev düşərgəyə dəvət etdiyi boksçuların hazırkı durumunu da dəyərləndirib: “Düzdür, koronavirus pandemiyası səbəbindən bir balaca çətinliklər yaşadıq. Ölkə çempionatı və gənclər arasında Azərbaycan birinciliyi də bir qədər gec keçirildi. Amma bunun bizim işimizə və uğurlu çıxışımıza təsiri olmayacaq. Avropa çempionatına hazırlıq üçün vaxt az olsa da, yarışa komandamızın tam hazır olması üçün əlimizdən gələni edirik. Hədəf Xorvatiyada yaxşı çıxış etməkdir. Komanda üçün federasiya tərəfindən lazımı şərait yaradılıb, hər şey qaydasındadır. Martın 11-də turnirin təşkil ediləcəyi Xorvatiyada olmağı planlaşdırırıq. Bu da yarış məkanına öyrəşmək və Poreçdə də təxminən 2 gün məşqlərimizi davam etdirməyə hesablanıb”.
Böyük məşqçinin sözlərinə görə, heyətlər bəlli olduqdan sonra rəqibləri də analiz edib, boksçulara ətraflı məlumat veriləcək. Çalışdırıcı hər şeyin plan üzrə getdiyi üçün səfərə böyük ümidlərlə yollanacaqlarını da xüsusi vurğulayıb: “Bildiyiniz kimi, boks yarışları digər növlərlə müqayisədə bir qədər çox çəkir. Avropa çempionatı da 11 günlük uzun marafondur. Hələlik, hansı çəki dərəcələrində mübarizə aparacağımızı dəqiqləşdirməmişik. Hər şey təlim-məşq toplanışının gedişindən asılıdır. Çempionata az qalmış səfərə yollanacaq boksçularımızın adları bəlli olacaq. Əsas odur ki, hər bir idmançımız səylə çalışır və ölkə xaricində uğur qazanmaq üçün yorulmadan məşq edir”.
N.Abdullayev medalla bağlı proqnoz verməsə də, yığmada yer alacaq hər bir boksçuya böyük ümid bəslədiyini deyib. Onun sözlərinə görə, əsas hədəf Avropa çempionatında Azərbaycanın idman şərəfini layiqincə qorumaq və Bakıya mükafatlarla qayıtmaqdır: “Ad və ya medal sayı açıqlaya bilməyəcəm. Amma komandamıza federasiya rəhbərliyinin də, bizim də ümidimiz böyükdür. Çalışacağıq ki, Poreçdə himnimizi səsləndirək və üçrəngli bayrağımızı yüksəklərə qaldıraq. Bir sözlə, komandamızın medallar qazanacağına ümidvarıq”.
Qeyd edək ki, 13 çəki dərəcəsi üzrə keçiriləcək Avropa çempionatının püşkü martın 12-də atılacaq. Bir gün sonra yarışa start veriləcək. Qitənin ən güclü boksçularının adına isə martın 23-də aydınlıq gələcək.
Geri qayıt