Azərbaycan avarçəkənləri Qazaxıstandakı turnirdə 8 medal qazanıblar
3-06-2024, 15:05
Azərbaycan avarçəkənləri Qazaxıstanın Uralsk şəhərində “1 iyun – Uşaqların Beynəlxalq Müdafiəsi Günü”nə həsr olunmuş kayak və kanoe üzrə beynəlxalq turnirdə 8 medal qazanıblar.
BrendSport.az xəbər verir ki, 5 ölkədən 10-a yaxın komandanın mübarizə apardığı yarışda təmsilçilərimiz 2 qızıl, 3 gümüş və 3 bürünc mükafat əldə ediblər.
Yığmanın heyətində Cavid Vəlizadə 2 nəfərlik kanoe qayığında 200 metr məsafəyə mübarizədə qızıl, 500 metr məsafəyə yarışda gümüş medala yiyələnib. Bundan başqa, C.Vəlizadə 1 nəfərlik kanoe qayığında 200 və 500 metr məsafələrdə də ikinci yeri tutub. Qarışıq komanda yarışında isə idmançı 500 metr məsafəni üçüncü pillədə bitirib.
Emil Zeynalov 2 nəfərlik kayak qayığında qarışıq komanda yarışında 500 metr məsafəni birinci sırada tamamlayıb. Vacib Babayek-Şahin İsayev cütlüyü 2 nəfərlik, Niyaz Məlikov isə 1 nəfərlik kayak qayığında 500 metr məsafədə üçüncü olub.
Geri qayıt