Çempionlar Liqası: Ardıcıl qələbələr, ilk məğlubiyyətlər və yeni rekordlar
Bu gün, 16:28
Ötən gecə UEFA Çempionlar Liqasının əsas mərhələsinin VII turunda keçirilən qarşılaşmalar bir sıra tarixi nəticələr və maraqlı statistik göstəricilərlə yadda qalıb.
BrendSport.az xəbər verir ki, səfərdə “İnter”i 3:1 hesabı ilə məğlub edən “Arsenal” Çempionlar Liqasında ardıcıl yeddinci qələbəsini qazanaraq klub tarixində yeni rekorda imza atıb.
İngiltərə təmsilçiləri arasında bu turnirdə daha uzun qələbə seriyası yalnız “Mançester Siti”yə məxsusdur. “Şəhərlilər” 2023–2024-cü illər aralığında ardıcıl 10 oyun qazanıblar. “İnter” isə bir mövsümdə ilk dəfə Çempionlar Liqasında ardıcıl üç matçda məğlub olub.
“Tottenhem” doğma meydanda “Borussiya Dortmund”u 2:0 hesabı ilə üstələyərək bu mövsüm evdə keçirdiyi dörd Çempionlar Liqası oyununda da qalib gəlib. London klubu turnirdə hələ də öz meydanında qol buraxmayan yeganə komandadır.
“Vilyarreal” səfərdə “Ayaks”a 1:2 hesabı ilə uduzub. Bununla da İspaniya təmsilçisinin Çempionlar Liqasında qələbəsiz oyunlar seriyası 10-a yüksəlib ki, bu da turnir tarixində ispan klubları üçün ən mənfi göstəricilərdən biri sayılır. “Ayaks” isə İspaniyada Avropa turnirləri çərçivəsində səkkizinci səfər qələbəsini qazanıb.
“Olimpiakos”un “Bayer” üzərində 2:0 hesablı qələbəsində Kostinyanın 1-ci dəqiqə 32-ci saniyədə vurduğu qol klub tarixində Çempionlar Liqasındakı ən erkən qol olub.
“Napoli”nin səfərdə “Kopenhagen”lə 1:1 hesablı heç-heçəsində Skott MakTominey diqqət çəkib. Şotlandiyalı yarımmüdafiəçi İtaliyaya transfer olunduqdan sonra başla vurduğu qolların sayına görə A Seriyası klubları arasında liderdir.
“Sportinq”in PSJ üzərində 2:1 hesablı qələbəsi isə Paris təmsilçisi üçün tarixi məğlubiyyətlə nəticələnib. Fransa çempionu 2013-cü ildən sonra ilk dəfə Avropanın “Top-5” liqasına daxil olmayan bir komandaya Çempionlar Liqasında uduzub.
Turun ən sensasiyalı nəticələrindən biri Norveçdə qeydə alınıb. “Budyo Qlimt” “Mançester Siti”ni 3:1 hesabı ilə üstələyərək Çempionlar Liqası tarixində İngiltərə klubunu məğlub edən ikinci Norveç komandası olub. Bundan əvvəl bu uğura yalnız “Rusenborq” nail olmuşdu. Həmçinin bu qarşılaşmada Erlinq Holannın son səkkiz rəsmi görüşdə penaltilər istisna olmaqla qol vura bilməməsi diqqət çəkib ki, bu da onun klub karyerasında ən uzun məhsuldarlıq böhranlarından biridir.
Geri qayıt