2024-cü ildə keçiriləcək futzal üzrə dünya çempionatının reqlamenti açıqlanıb. Seçmə mərhələnin oyunları 2022-ci ilin aprelində başlayacaq, iki il sonra aprel ayında başa çatacaq.
BrendSport.az Azərbaycan Futzal Federasiyasına istinadla xəbər verir ki, mundialın final mərhələsində iştirak edəcək 24 komandadan 7-si Avropa qitəsinin təmsilçisi olacaq. Əgər 3 il sonra baş tutacaq həlledici mərhələyə ev sahibliyi Avropa ölkələrindən birinə verilərsə, seçmə mərhələdən 6 komanda final mərhələsinə vəsiqə qazanacaq.

Seçmə mərhələnin formatı necə olacaq?

Final raundunadək oyunlar 5 mərhələdən – ilkin (mini-turnir), əsas (ev və səfər), əsas mərhələ play-off (ev və səfər), elit (ev və səfər) və elit raund pley-offdan (ev və səfər) ibarət olacaq.

İlkin mərhələdə reytinq cədvəlinin son 24 pilləsində yer alan komandalar - Moldova, Monteneqro, Albaniya, Kosovo, Türkiyə, Norveç, Danimarka, İsveç, Ermənistan, Almaniya, Yunanıstan, İsrail, İsveçrə, Kipr, Bolqarıstan, Litva, Andorra, San Marino, Estoniya, Malta, Şotlandiya, Cəbəllütariq, Avstriya və Şimali İrlandiya iştirak edəcəklər. Bu mərhələnin püşkü cari il dekabrın 7-də, oyunları isə gələn il aprelin 4-13-də keçiriləcək. Komandalar hər birində 4 iştirakçı olmaqla, 6 qrupda mübarizə aparacaqlar. Qrup qalibləri və ikinci pillənin sahibi olan komandalar əsas mərhələyə vəsiqə qazanacaqlar.

Millimiz mübarizəyə əsas mərhələdən başlayacaq

Əsas mərhələdə 36 komanda iştirak edəcək ki, artıq onlardan 24-ü məlumdur. Millimiz də mübarizəyə bu mərhələdən başlayacaq: İspaniya, Rusiya, Portuqaliya (son qalib), Qazaxıstan, Xorvatiya, Serbiya, Azərbaycan, İtaliya, Çexiya, Ukrayna, Sloveniya, Bosniya və Herseqovina, Polşa, Finlandiya, Rumıniya, Slovakiya, Gürcüstan, Belarus, Niderland, Macarıstan, Fransa, Belçika, Latviya və Şimali Makedoniya.
Əsas mərhələnin püşkü gələn il iyulun 6-da atılacaq, oyunlar isə 2023-cu il martın 8-dək yekunlaşacaq. Otuz altı komanda hər birində 3 iştirakçı olmaqla 12 qrupa səpələnəcək. Oyunlar ev-səfər prinsipi ilə keçiriləcək. On iki qrup qalibi və ikinci pillədə yer alan komandalar arasında ən yaxşı göstəriciyə malik 4 milli birbaşa elit raunda yüksələcək. Qalan 8 qrup ikincisi isə pley-off oyunlarında üz-üzə gələcək. 2023-cu il martın 10-da pley-off cütlükləri müəyyənləşəcək, oyunlar isə təxminən bir ay sonra – aprelin 10-19-da keçiriləcək. Ev-səfər matçlarının yekununda üstün olan 4 yığma elit raunda yollanacaq.

20 komanda 5 qrupda

Elit raundun püşkü 2023-cü il iyulun 5-də atılacaq, həmin il dekabrın 20-dək qrup matçları yekunlaşdırılacaq. İyirmi komanda 5 qrupda yarışacaq. Hər qrupda 4 komanda ev-səfər olmaqla mübarizə aparacaq. Qrup qalibləri final mərhələsinə birbaşa vəsiqə qazanacaqlar. Ən yaxşı göstəriciyə malik 4 “ikinci” isə pley-off oyununda iştirak edəcək. Əgər final mərhələsinə ev sahibliyi Avropa ölkələrindən birinə verilsə, o zaman pley-off mərhələsinə ən yaxşı göstəriciyə malik 2 “ikinci” vəsiqə qazanacaq. Elit raundun pley-off oyunlarının püşkü 2024-cü il 25 yanvarda, oyunları isə aprelin 8-17-də keçiriləcək.